Fredy JAOFERA
Poète
Co-Fondateur et 1er Vice-Président de l'Union des Poètes et Ecrivains Malgaches section France
Vice-Président de la Maison Culturelle Malgache de France
Membre de l'Association des Poètes des Afriques et d'Ailleurs
Chevalier de l'Ordre des Arts, des Lettres et de la Culture par la République de Madagascar
Ry Mpamaky,
Vao dimy taona monja aho teto an-tany dia efa nisy tao amiko ny faniriana hanoratra saingy amin'ny maha-zaza ahy dia mbola ny lalao no mibahana tao an-tsaina mandrakariva. Na dia izany aza anefa dia efa nisy feon'ny fieritreretako no nibitsika ahy foana hoe : " Manorata", "Raiso ny penina ", na dia mbola ankizy aza aho sy tsy matotra ny saina sy ny fomba fanoratra ary tsy voafehiko akory ny teny malagasy. Noraisiko ny penina ary manoratra aho haztramin'izao. Ny andro, ny taona, ny fotoana, ny sedra, ny ady mafy ary ny ranomaso no nanefy, nanamboatra, namolavola ary nikolokolo ahy teny amin'ny fiainana ka nambosesika hatrany ny aingampanahy izay tsapako toy ny loharano tsy ritra ao anatiko ao.
Fredy JAOFERA
AO
Ao mitady fahoriana,
ao mitady fiadanana ;
ao no mahazo fijaliana,
ao no mahazo fihavanana.
Ao mitady fandravana,
ao mitady fanorenana ;
ao no very mihanahana,
ao no ravo be fonenana.
Ao mitady herisetra,
ao mitady zava-tsoa ;
ao no ory tsisy fetra,
ao no tretrika tokoa.
Ao mitady ranomaso,
ao mitady fahendrena,
ao no lavo be ankaso,
ao no mahazo fandresena.
Fredy JAOFERA
MANARAKA
Manaraka ahy ihany
ny endrikao taloha
ka malahelo izany
sy hafahafa koa.
Manaraka ahy ihany
ny tsikinao tsy foiko,
miampy ireo tomaniko,
ry efa nohadinoiko !
Manaraka ahy ihany
ny hasambarantsika,
maniry ny hankany
fa mila hangatsiaka.
Manaraka ahy ihany
ny voady izay natao,
mamelona ny tany
hivazo tahaka izao.
Fredy JAOFERA
ISANY
Isan'ny fiainako
ny fananako anao :
tsiky marainako
tsy misy raorao.
Isan'ny andriko
tsy hampiroaroa,
tena tsy andriko
raha any tokoa.
Isan'ny anjarako
mamy aok'izany
ilain'ny anarako
raha lasa vinany.
Isan'ny vintako
mpamelon-kira
tian'ito kintako
ka avia mifikira.
Fredy JAOFERA
MATETIKA
Matetika ianao
no vetsovetsoina
hitondra hira vao
sy hita antsoina.
Matetika ianao
no eritreretina
hampifamaho
'reo noraketina.
Matetika ianao
no taditadiavana
hiteny ahy andao
fa efa notoavina.
Matetika ianao
no tsarotsaroana
hanova eto izao
ho firavoravoana.
Fredy JAOFERA
NY FOKO NO POETY
Ny rima izay mivoaka
raha toa ka metimety,
tsy nampiasaina toaka
fa ny foko no poety.
Ny ainga izay misosa
raha ambara vetivety,
tsy mpirediredy kosa
fa ny foko no poety.
Ny vetso izay mitsiry
raha feno sy tia fety,
tsy tery na mba kiry
fa ny foko no poety.
Ny kanto izay miseho
raha harena sy mitety,
tsy tonga ho azy teo
fa ny foko no poety.
Fredy JAOFERA
TSINDRIAN-DAONA
Tsindrian-daona
ny tenako ho any
fa ela tsy nihaona
ka misento ihany.
Tsindrian-daona
ny hahita tarehy
sao dia misaona
fa tsy mihomehy.
Tsindrian-daona
ny hahazo vaovao
fa efa aman-taona
no mba nifandao.
Tsindrian-daona
ny hahare tantara,
satry tsy hivaona
fa ho tsara fiafara.
Fredy JAOFERA
TSY AHOAKO
Tsy ahoako ny halavirana
rehefa misy ny fitiavana,
mazam-be ny fifikirana,
toy izany ny finiavana.
Tsy ahoako ny harerahana
rehefa misy hasambarana,
tsy mba misy fanebahana
fa hafaliana azo ianarana.
Tsy ahoako ny hafanana
rehefa tanjona ny ho any
fa tsaroana mahatamana
sy feno tsiro tsy hita lany.
Tsy ahoako izay diavina
rehefa ambara fa fotoana,
ianao ange tsy azo lavina
sy mampiainga eto foana.
Fredy JAOFERA
TSY NIOVA
Tsy niova aho akory
fa mbola ito mitory
ny fitiavako anao
tsy mety mandao.
Tsy niova aho akory
fa mainka mamory
'reny taona tsy foy,
na,hoe, hadinoy.
Tsy niova aho akory
fa raha tsy matory
dia manoratra lava
ny voady efa rava.
Tsy niova aho akory
fa raha vao oriory
dia miverina foana
ny ora nahamoana.
Tsy niova aho akory
fa raha vao sorisory
no mameno ny tany
dia lasa-tomany.
Fredy JAOFERA
TSY HIVERENAKO
Tsy hiverenako
ny hita nandratra
na hanorenako
ny soa tsisy fatra.
Tsy hiverenako
'zay efa nandao
na hanarenako
ny Lasa nahamavo.
Tsy hiverenako
'zay efa nandrava
na hitombenako
fa hoe mbola hisava.
Tsy hiverenako
'zay efa nahavoa
sao hanenenako
ka hahakenda tokoa.
Fredy JAOFERA
AZA FOHAZINA
Aza fohazina eto intsony
ny alahelo izay matory
sao hitraotra ka ny ony
hisavora...Hanorisory !
Aza fohazina eto intsony
ny ranomaso izay mijoy
sao hikiky ka tsy hitony
ny sentosento be nitohy.
Aza fohazina eto intsony
ny adiady izay nitranga
sao re indro ho lonilony
no hisisika sy hiranga.
Aza fohazina eto intsony
ny tebiteby izay nahazo
sao ho faty ka tsy hamony
'lay niriko ho voninkazo.
Fredy JAOFERA
HADINONAO VE ?
Hadinonao ve
ireo hirahirantsika
fa ny foko kely ange
mahay mamorona mozika ?
Hadinonao ve
'lay takarivantsika
fa n'aiza n'aiza aleha
mbola ravo sy mikiaka ?
Hadinonao ve
'reo fahatsiarovantsika
fa ny hany sisa re
toa kalo iray mandriaka ?
Fredy JAOFERA
MISY SORATSORATRA
Misy soratsoratra
namborahana fitiavana,
mbola ohatrohatra
manefy tomandavana.
Misy soratsoratra
mamoha indray ny ratra
sy manokatsokatra
ny alahelo izay nihatra.
Misy soratsoratra
mitondra ny ady mafy
toa mamela holatra
sy tsaroana nampihafy.
Misy soratsoratra
mampirotsa-dranomaso,
na efa mamokatra
hasambarana hita maso.
Fredy JAOFERA
IZAY MISY NY FITIAVANA
Izay misy ny fitiavana
no misy fahasambarana
raha any no itadiavana
'reo nofy nisantarana.
Izay misy ny fitiavana
no misy fahombiazana
raha any re, rahavana,
ny tsiky no fafazana.
Izay misy ny fitiavana
no misy fanambinana
raha any izay goavana
ho toky sy fiankinana.
Izay misy ny fitiavana
no misy ny eritreritra
raha any tomandavana
ny saina sy ny hevitra.
Fredy JAOFERA
